އެޑް ޕަޒުލް

 

އެޑްޕަޒުލްއަކީ އެއްވެސް އަގަކާއިނުލައި، ދަރިވަރުންނަށް މަސައްކަތް ހަވާލުކޮށް، މަސައްކަތުގެ ފެންވަރު ވަޒަންކުރުމަށް ވަރަށް ވެސް ރަނގަޅު މަންސައެކެވެ. އިންޓަރެކްޓިވް އޮންލައިން ވީޑީޔޯތައް ތައްޔާރުކޮށް އެއަށް، އޯޕަން އެންޑެޑް ކުއެސްޝަން ނުވަތަ މަލްޓިޕުލް ޗޮއިސް ކުއެސްޝަން، ނޯޓްސް، އޯޑިޔޯ ޓުރެކްސް، ފަދަ އެއްޗެހި އިންސާރޓްކޮށްލެވެއެވެ. މި މަންސަ ފަރުމާކޮށްފައިވަނީ، ތަފާތު ގިނަ ވަސީލަތްތަކުން މައުލޫމާތު ހޯދޭނެގޮތަށެވެ. މިގޮތުން ޔޫޓިއުބް، ޓެޑް، ޙާން އެކަޑަމީ، ވިމޯ، ނޭޝަނަލް ޖިއޮގުރަފީ ފަދަ ވަސީލަތްތައް ފާހަގަކޮށްލެވެއެވެ. މިއީ މުދައްރިސުންނަށް ބޭނުންކޮށްލަން ފަސޭހަ، ދަރިވަރުން ޝައުޤުވެރިވާނެފަދަ އެޕްލިކޭޝަނެކެވެ. ތައުލީމީ ދާއިރާއަށް ހާއްސަކޮށްފައިވާ މި މަންސައަކީ ވަރަށް ފަސޭހައިން އެކްސަސްވެވޭ މަންސައެކެވެ.

އެޑްޕަޒުލް ބޭނުންކުރާ ގޮތް

    ވީޑިއޯ: އެޑްޕަޒުލްއަށް ސައިން-އިން ވާނެ ގޮތް.

ކިޔަވައިދިނުމުގައި އެޑްޕަޒުލް ބޭނުންކުރާނެ ގޮތް

އެޑްޕަޒުލްއަކި ކިޔަވައިދިނުމަށް ހާއްސަކޮށްގެން ފަރުމާކޮށްފައިވާ ވެބްސައިޓެކެވެ. މި ވެބްސައިޓަށް ލޮގްއިން ވާ ހިސާބުން އެ މީހަކު މަސައްކަތްކުރާ ސްކޫލެއްގައި މަސައްކަތްކުރާ ހުރިހާ މުދައްރިސުން އެ މަންސާގައި ހިއްސާކޮށްފައި ހުރި އެއްޗެހި ފެންނާނެއެވެ. ހަމއެހެންމެ އެހެނިހެން ރިސޯސަސްތަކުން ވެސް ހޯދަން ބޭނުންވާ މައުލޫމާތެއް، ވީޑީޔޯއެއް ހޯދަން ވަރަށް ފަސޭހަވެގެންވެއެވެ. މިގޮތުން މި ވެބްސައިޓްގައި ހާން އެކަޑަމީ، ޔޫ ޓިޔުބް، ނެޝަނަލް ޖިޔޮގުރަފީ ފަދަ އެތައް ސޯސްތަކަކުން މައުލޫމާތާއި ވީޑިޔޯ، އޯޑިޔޯ ސާރޗްކުރެވެއެވެ. އެހެންކަމުން މިއީ ފަސޭހައިން ބޭނުންވާ އެއްޗެއް ހޯދާލެވޭ ވެބްސައިޓެކެވެ. ސާރޗްކޮށްގެން ވިޑީޔޯ ހޯދުމުގެ އިތުރުން އެ ހޯދާ ވީޑީޔޯއަށް މުދައްރިސް ބޭނުން ގޮތަކަށް ސުވާލުތައް އިތުރުކޮށް ހެދޭނެއެވެ. ނުވަތަ ހަމަ އެ ވީޑިޔޯ ދަރިވަރުންނާ އެސައިން ކުރެވިދާނެއެވެ.

މުދައްރިސުން އެޑްޕަޒުލް ބޭނުންކުރާނެ ގޮތް

އެޑްޕަޒުލްއަކީ ކިޔަވައިދިނުމަށް، މުދައްރިސުންނަށް އޭގެ ބޭނުން ވަރަށް ފުރިހަމަ ގޮތުގައި ހިފޭނެ މަންސައެކެވެ. މިގޮތުން ނަގާދޭން ބޭނުންވާ ފިލާވަޅަކާ ގުޅޭގޮތުން ވީޑިޔޯއެއް ހޯދުމަށްފަހު، ދަރިވަރުންނަށް އެ ވީޑިޔޯ ދައްކާލެވިދާނެއެވެ. ނުވަތަ ކުރިން ހަދާފައި އޮތް ވިޑިޔޯއެއް ވެސް (އެޑްޕަޒުލްގައި ހިމެނޭ ރިސޯސަސްތަކުގެ ތެރެއިން) ދަރިވަރުންނަށް ދައްކާލެވިދާނެއެވެ. ދަރިވަރުން ކުރާނެ މަސައްކަތެއް ހިމަނާފައި، ނެތްނަމަ އަމިއްލައަށް ވެސް ވީޑީޔޯ އެޑީޓްކޮށް ވީޑީޔޯއަށް، މަސައްކަތެއްލެވިދާނެއެވެ. ދަރިވަރުން އެއަށް ޖަވާބުދިނުމުން، ދަރިވަރުންގެ ފެންވަރު ވެސް ވަޒަންކުރެވިގެންދާނެއެވެ. ކޮންމެ ކުލާހަކަށް ނުވަތަ ގުރޭޑަކަށް ވެސް ވަކިން ފޯލްޑާ ހެދުމަށްފަހު، އެ ކުލާހެއްގެ ނުވަތަ އެ ގްރޭޑެއްގެ ދަރިވަރުންނަށް ދައްކަން ބޭނުންވާ އެއްޗެއް އެ ފޯލްޑާއަށް ލެވޭނެއެވެ. އަދި ކުލާސްތަކަށް ދަރިވަރުންނަށް އިންވައިޓްކުރެވޭނެއެވެ. އެހެންކަމުން މިއީ މުދައްރިސަށް ފިލާވަޅު ދަރިވަރުންނަށް ބުނެދޭން ފަސޭހަވެ، ދަރިވަރުންގެ ފެންވަރު ވަޒަންކުރަން ފަސޭހަވެގެންދާނެ މަންސައެކެވެ.

    ވީޑިއޯ: އެޑްޕަޒުލްގެ ފީޗަރސްތައް.

ދަރިވަރުން އެޑްޕަޒުލް ބޭނުންކުރާނެ ގޮތް

އެޑްޕަޒުލްއަށް ދަރިވަަރެއްގެ ގޮތުގައި ވެސް ސައިންއިން ވެވޭނެއެވެ. މިގޮތަށް ސައިން އިން ވުމަށްފަހު، މައުލޫމާތު ހޯދަން ބޭނުންވާ ދާއިރާއެއް ސާރޗްކޮށްގެން މައުލޫމާތު ހޯދާލެވޭނެއެވެ. އަދި ވީޑިޔޯތަކުގައި ދީފައިވާ މަސައްކަތްތައް ފުރިހަމަކޮށް، ރަނގަޅު ޖަވާބު އަމިއްލައަށް ވެސް އެނގިގެން ދާނެއެވެ. ދަރިވަރު އަމިއްލައަށް ވިޑީޔޯ އެޑިޓްކޮށް އެއަށް މަސައްކަތްތައްލުމުގެ ފުރުސަތު ވެސް މި މަންސައިން ދަރިވަރުންނަށް ލިބިގެންދެއެވެ. އެހެންކަމުން މިއީ ދަރިވަރު އަމިއްލައަށް ވެސް ދަރިވަރުގެ ފެންވަރު ވަޒަންކޮށް، އުފެއްދުންތެރިކަން އިތުރުކުރެވޭނެ ގޮތެކެވެ.

    ވީޑިއޯ: އެޑްޕަޒުލްގައި ހިމެނޭ ވީޑިއޯއެެއް އެޑިޓް ކުރާނެ ގޮތް.

ކިޔަވައިދިނުމުގައި އެޑްޕަޒުލް އެހީތެރިވެދޭ ގޮތް

އެޑްޕަޒުލްއަކީ އުނގެނުމާއި އުނގަންނައިދިނުމަށް ހާއްސަކޮށްގެން ފަރުމާކޮށްފައިވާ ވެބްސައިޓަކަށްވުމުން، މި ވެބްސައިޓުގެ ކޮންމެ ފީޗާރއަކީ ވެސް ކިޔަވައިިދިނުމުގައި އެހީތެރިވެދޭ ފީޗާރއެކެވެ. މިގޮތުން ޓީޗާރުންނަށް ޓީޗިންގް އެއިޑްގެ ގޮތުގައި މި ވެބްސައިޓްގައި ހިމެނޭ ރިސޯސްތަކުން ނަގާ ވީޑިޔޯ، އޯޑިޔޯ ފައިލްތައް ބޭނުންކުރެވޭނެއެވެ. އަދި އަމިއްލައަށް ފަސޭހަކަމާއެކުގައި ވީޑިޔޯ، އޯޑިޔޯ އުފައްދާވެސް ލެވެއެވެ. މިއީ ކިޔަވައިިދނުމަށް އެޑްޕަޒުލް އެޖީތެރިވެދޭ އެއް ގޮތެވެ. ދެވަނަ ގޮތަކީ ދަރިވަރުންގެ ފެންވަރު ވަޒަންކުރަން ފަސޭހަވުމެވެ. އެހެނީ ދަރިވަރުން، ވީޑީޔޯތަކުގައި ހިމެނޭ މަސައްކަތްތައް ފުރިހަމަކުރުމުން، އެ ދަރިވަރަށް ފިލާވަޅު ފަހުމުވި މިންވަރު ވަޒަންކުރަން ފަސޭހަވާނެތިއެވެ.

21 ވަނަ ގަރުނުގެ ކިޔަވައިދިނުމަށް ޒަމާނާ އެކަށޭނަ ބަދަލެއް ގެނައުމަށް އެދޭނަމަ، އެޑްޕަޒުލްއަކީ ކިޔަވައިދިނުމުގައި ކޮންމެހެންވެސް ބޭނުންކުރުން މުހިންމު މަންސައެކެވެ. އެހެނީ  މި ވެބްސައިޓުން އައިސީޓީ އިންޓަރގުރޭޓް ކޮށްގެން ކިޔަވައިދިނުމުގެ އެއް މޮޑެލްކަމުގައިވާ ސަމަރ މޮޑެލް ވަރަށް ރަނގަޅަށް އެޕްލައިކުރެވޭތީއެވެ.

 ތާވަލު 1 (އެޑްޕަޒުލް ބޭނުންކުރުމުން ސަމަރ މޮޑެލް އެޕްލައިކުރެވޭގޮތް)

ސަމަރ މޮޑެލްގެ ބައިތައް	ކިޔަވައިދިނުމުގައި ބޭނުންކުރެވޭ ގޮތް
ސަބްސްޓިޓިއުޝަން	ކަރުދާހުގައި ލިޔުމުގެ ބަދަލުގައި ވީޑިޔޯގައިލިޔުން.
އާރގިއުމެންޓޭޝަން	ދަރިވަރުންގެ ހިޔާލުތައް ވީޑިޔޯގެ ތެރެއަށްލުން.
މޮޑިފިކޭޝަން	މުދައްރިސް ތައްޔާރުކޯށްފައިވާ ވީޑިޔޯއަށް، ދަރިވަރުން މަލްޓީޕުލް ޗޮއިސް އަދި އޯޕަން އެންޑެޑް ސުވާލުލުން. އެއް ދަރިވަރަކު އަނެއް ދަރިވަރަކާ ވީޑިޔޯ ބަދަލުކޮށް، ސުވާލުތަކަށް ޖަވާބުދީ، ފީޑްބެކް ދިނުން.
ރީޑެފިނީޝަން	ވީޑިޔޯ އެޑްޕަޒުލް މެދުވެރިކޮށް އެހެން މުދައްރިސުންނާއި ދަރިވަރުން ބޭނުންކުރަން ފުރުސަތުދިނުން. އަދި އެމީހުންގެ ކޮމެންޓްތައް އެނަލައިޒްކުރުން.

    ވީޑިއޯ: އެޑްޕަޒުލްގައި ވީޑިއޯއެއް ތައްޔާރުކުރާނެ ގޮތް.

އެޑްޕަޒުލް ބޭނުންކުރުމުގައި ހުރި ގޮންޖެހުންތައް

މުދައްރިސުންނަށް ހުރި ގޮންޖެހުންތައް	ދަރިވަރުންނަށް ހުރި ގޮންޖެހުންތައް
އެއްކަހަލަ ވީޑިޔޯތަކެއް ބަލަންވުމުން، ދަރިވަރުންގެ ޝައުޤުވެރިކަން ގެއްލުން.	ފިލާވަޅު ފަހުމު ކުރުމުގައި އޮޅުންއަރާ ކަންތައްތައް އޮޅުންފިލުވަން އުނދަގޫވުން.
ބައެއް ވިޑީޔޯތަކުގެ ކޮލިޓީ ދަށްވުން.	ހުރިހާ ލަރނިންގް ސްޓައިލެއްގެ ކުދިންނަށް "ކޭޓަރ" ނުކުރެވުން.

އެތިކަލް ކޮންސިޑަރޭޝަން އޮފް އެޑްޕަޒުލް

އިންޓަރލެކްޗުއަލް ކޮޕީރައިޓްގެ ދަށުން ގާނޫނީ ބާރު ލިބިފައިވާ އެއްވެސް އުފެއްދުމެއް، އެޑްޕަޒުލްގައި ހިމެނުމުގެ ކުރިން ތިމާއަކީ އެކަން ކުރުމަށް އޮތޮރައިޒޭޝަން ލިބިފައިވާ މީހަކަށްވާން ޖެހެއެވެ. މި މަންސައިގައި ކޮޕީރައިޓް ވައިލޭޝަން އެއްގޮތަކަށް ވެސް ބަލައެއް ނުގަނެއެވެ. އެއްވެސް ބައިވެރިއެއްގެ ފަރާތުން އެފަދަ ކަމެއް ފާހަގަކުރެވިއްޖެނަމަ، މި ސައިޓަށް ވަނުމުގެ އެކްސެސް އެބައިވެރިޔާގެ ކިބައިން ނަގައެވެ. މި ވެބްސައިޓްގައި ތަފާތު އެތައް ސޯސްތަކަކުން ވަސީލަތްތައް ލިބެން ހުންނާތީވެ، އެ ސޯސްތަކުން ހިފަހައްޓާ ކޮޕީރައިޓްގެ އުސޫލުތަކަށް ވެސް މި ވެބްސައިޓުން ބަލައެވެ. މިސާލަކަށް ޔޫޓިއުބަށް އަޕްލޯޑްކޮށްފައިވާ ވީޑީޔޯތައް ބޭނުންކުރަނީ، ޔޫޓިޔުބްގެ ޓާމްސް އޮފް ސާރވިސް އެކްސެޕްޓް ކޮށްގެނެވެ. އެޑްޕަޒުލްގައި ބޭނުންކޮށްފައިވާ ޔޫޓިއުބް ވީޑިޔޯއެއް، ޔޫޓިއުބުން ނަގައިފިނަމަ، އެ ވީޑީޔޯ އެޑްޕަޒުލްއިން ވެސް ނަގައެވެ. އެހެންކަމުން އެޑްޕަޒުލްއަކީ އެތިކަލް ކޮންސިޑަރޭޝަންއަށް ވަރަށް ބޮޑަށް ބަލާ މަންސައެކެވެ.